今日完成左愛心耆義剪髮術，感覺鬆一口氣。記得初時參加服務，係因為可以學到技能，幫到公公婆婆之餘又可以幫自己理髮。後來又醒起可以藉著剪髮，同家人共同創造多一點回憶 ^^

作為學生，我嘅髮術麻麻地，多得導師同拍檔指導，可以順利完成剪髮。

作為義工，我覺得為長者剪髮，感覺好新鮮。透過温柔嘅身體接觸，彼此更容易熟悉。當我見到長者就坐低個陣，髮術麻麻既我就會不期然扮演髮型師：“請坐請坐~ 想點剪呢”

作為活動籌委，我見到自己做得好與不好嘅地方。今次服務令我加深對每個義工嘅認識，亦知道當有困難、覺得辛苦嘅時候，有一班幹事會好慷慨相助，我可以好坦承咁講出我諗法、感想、請求，而唔應該收收埋埋自己做晒。今次籌備過程再次提醒我，多溝通，多發表可以令大家合作更好，令事情做得更好。

雖然過程吃力，但見到義工同公公婆婆面上都足滿笑容，我覺得好滿足。

我好鍾意見到其他人嘅笑容，每一位嘅笑容都係令我笑嘅源頭。每一位嘅評價同鼓勵，都俾左我更多力量同方向，令我將來做得更好。多謝，多謝每一位！

By 強

服務: 愛心耆義剪髮術 (28/7 & 4/8/2013)