2013.07/08 – 記一次籌委有感 By 強

Hello~ 我個名叫阿強

最近負責籌備愛心耆義剪髮術，好似飲左劑廿四味咁，苦而有益。

我係第一次參加剪髮，亦係第一次負責一個較複雜嘅活動，聯絡義工啦，聯絡機構啦，聯絡導師啦，買道具啦。。。。大部分都係新嘗試，所以會覺得不安，會擔心做漏。

我初期統籌時唔多上心，無諗過咁複雜，無諗過咁多野要準備，最主要係無諗過“咁上心為咩？”然後時間愈黎愈近，我就好似牛咁樣做做做做。其實真係幾辛苦。
第一節服務完左之後，我已經覺得辛苦都係值得嘅，因為無論公公婆婆或者義工們都過左一個開心嘅下晝。見到大家嘅笑容我就滿足啦，而且再聯絡義工第二次服務嘅時候，聽到大家分享趣聞、笑聲、緊張嘅感覺，我覺得比第一次多左力量，多左期待。

今次籌備活動令我明白，我有成個幹事會支持，如果覺得辛苦，一定要搵大家幫手。如果自己承擔一切，活動雖然會搞得成，但以今次為例，我好難全程投入過程，因為分左心係籌備工作。

其實將心比心，我好想聽到大家對今次活動嘅感想，等我知道自己做得好 / 有地方可以做得好。所以無論係活動、會議、日常生活，我都應該將我心入面嘅想法，同大家分享，令事情變得更好做得更好。

By 強

服務: 愛心耆義剪髮術 (28/7 & 4/8/2013)

訪問者流量
最後更新日期: 2020 年 04 月 04 日