不一樣的服務。不一樣的感受 ~ by Winnie CHU

參加服務名稱:

傷健藝墟繽FUN團 (2015年08月)

傷健藝墟繽紛團的整個服務計劃終於完成~

感恩有今次嘅機會,可以係呢度成為工藝導師,將自己熱愛嘅嘢教授比其他人,令人哋體驗完之後都鍾意,然之後又會再教其他人。中間的滿足感真係好大。

係呢3個星期入面,同學生們的互動中有很深的感受。 我見到啲有肢體殘障嘅學生,一開始已經非常期待學習我哋帶去嘅工藝。其中我地會擔憂佢能力嘅限制,做皮革夠唔夠力呢? 得一隻手可以靈活做圖章雕刻會唔會好危險呢?表達嘅時候說話唔清楚究竟會唔會可以係藝墟教到人做呢? 佢哋會唔會唔夠信心呢?

種種嘅擔憂其實原來都只係我對佢地的唔解。由一開始我見到佢哋已經非常之主動參與,既期待又興奮。客觀嘅事實可能係佢哋肢體上有障礙,但係結果佢哋都一樣非常出色。雖然隻手唔夠力,但係佢哋用努力去完成,既細心,又認真同埋堅持,有耐性咁去做到最好。唔係馬馬虎虎,或者輕易放棄直接叫義工幫手。結果佢哋啲作品有好多都靚過我地的義工tim。(亦令義工們更積極去做)

曾經諗過要坐住輪椅會唔會好自卑呢, 但係見到佢哋散發出來的正能量,令人非常之樂意同佢接近。對人嘅真誠令我感到非常之舒服。

原來呢個世界上有咁漂亮嘅人,單純地鍾意做就會全力去做。
其實人就係咁啦,因為食生嘢會病,所以學識煮嘢食,因為怕黑,所以會運用燈光。 因為唔識得飛,所以先發明到飛機。

因為我們不夠完美,所以我們有無限可能。

做得到,只因為相信,相信自己會做到。

透過今次嘅服務,亦都鼓勵左我,唔需要為左不確定的未來而擔憂,做好而家嘅自己,認真咁樣去生活,未來一定會一幅豐盛的圖畫。

by Winnie CHU


訪問者流量
最後更新日期: 2017 年 08 月 16 日