加入咗青雲社差不多兩年，參與過不同種類嘅義工服務。而我感受最深刻嘅係白普理失明人士旅行。當日我哋要帶領失明人士行山同協助購物。其實我本身係一個自我存在感好低嘅人。但當日我帶領一個失明嘅婆婆行山，喺果兩個鐘時間內，好似成個世界只有我哋咁。第一次感受到婆婆對我嘅信任，每一步都會等我指示。去到平路，又會同我傾吓閒偈講吓生活。去到山路，婆婆又會等我指示。而最感動係佢擔心我會唔會因為路窄唔夠位企，叫我小心行。嗰日同婆婆渡過了開心又輕鬆嘅一日。呢個服務令我百分百專注同投入，令我感受到自己強烈嘅存在價值。係呢份魔力使我不辭勞苦咁做義工同搞服務。感恩有青雲社呢個平台。