傷健藝墟 ~ 籌委篇

我係2018年傷健藝墟嘅籌委之一,於第一節服務當日,我除咗同其他籌委一齊配合導師去令服務順利完成之外,我都有同傷健朋友一齊去學做手工。雖然流程好緊湊,但大家都做得好開心!

我好享受呢個服務架!同傷健人士一齊成為學生,導師教我哋整星空瓶、押花杯墊、蝶古巴特。大家嘅製成品都好靚好吸引!當中最印象深刻嘅係,坐喺我隔離位嘅傷健朋友,佢坐喺輪椅度,淨係得一隻手可以自由活動,嗰陣好想去幫佢做,但見佢手震震咁去堅持嘗試自己做,我嗰刻即刻明白佢唔需要我幫手。佢跟住導師既指示一個step 一個step 咁去做,慢慢咁去做,好有耐性。差少少嗰陣,我鼓勵佢,支持佢,或者輕輕推佢一把。當佢每完成一個作品嗰陣,佢笑到見牙唔見眼,我見到咁,真係仲開心過自己做呀!

佢咃令我體會想做就去做!一定做到架!同時令我學習到要欣賞身邊人值得欣賞嘅地方,支持同鼓勵佢哋!

分享者:Parson Cheung


訪問者流量
最後更新日期: 2018 年 11 月 09 日